Rice Terraces, muling nadiskubre sa Antique (News Article)

ni Rae Angelica Espinosa

Photo courtesy of www.katahum.com

   

SAN REMIGIO, ANTIQUE- Isang tagong yaman ang muling natuklasan sa kabundukan ng bayan ng San Remigio, Antique- ang hagdan-hagdang palayan na tulad ng sa Ifugao. Anim na ektarya ng haba ng palayan na pinangangalagaan ng grupo ng mga Iraynon Bukidnon-mga katutubong mula sa Barangay General Fullon.

     Makikita ang rice terraces sa isang kapatagang napaliligiran ng mga burol at kabundukan. Sa hilagang kanluran naman nito masisilayan ang dalawang talon at sa kabiang bahagi ay ang ilog Sibalon. Hindi na kataka-taka sa mga residente na kaunti lang ang bumibisita sa kanilang lugar sapagkat ang pinakamalapit na bayan sa kanila ay may layong labinwalong kilometro.

     Nadiskubre ang terraces noong Pebrero 2014 ng isang propesor mula sa Unibersidad ng Piipinas sa Visayas na si Propesor Emmanuel Lerona. Siya rin ay kilala bilang isa sa nagtaguyod ng Panay Bird Club.

   Ayon kay Lerona, naghahanap lamang siya sa Google Maps ng mga posibleng tirahan ng ibon sa kabundukan ng Miagao sa Iloilo at Madja-as Mountain Range nang may mapansin siyang mga hindi kilalang lugar na may kakaibang hugis sa pagitan ng San Remigio at Valderama sa Antique.

     Ipinaalam agad niya ito sa mga tauhan ng Katahum Tours na siyang tutulong sa kanya parang kumirmahin ang mga lugar na kanyang nadiskubre. Nagsimula ang paglalakbay ng grupo noong ika-27 ng Agosto at bumagtas sila ng limang bundok upang makarating sa rice terraces.

Photo courtesy of www.philippineslifestyle.com

     Natuklasan nila na ang barangay ng General Fullon ay sagana sa yamang tubig dahil sa dalawang talong nakapapaligid dito- ang Iglangit at Igtamoni na ginagamit na patubigan sa mga

“taraman” o bukid. Malapit rin dito ang Ilog Sibalom na pinagkukunan ng mga residente ng mga isda at hipon.

     Ang saganang tubig sa lugar rin ang dahilan kung bakit nakapagtatanim sila ng dalawang klaseng produkto sa isang taon.

     Ayon kay Jun Bayog, isang opisyal sa barangay, ang palayan at natatamnan nila ng palay mula Marso hanggang Mayo para sa unang ani, ikalawang ani naman tuwing Hunyo hanggang Agosto at ikatlo sa Setyembre hanggang Nobyembre. Panahon naman ng tabako tuwing Disyembre hanggang Pebrero.

     Kaunti lang sa mga kanilang ani ang ibinibenta ng mga katutubo dahil iniimbak nila ito para sa kanilang pansariling kagamitan.

     Dahil sa pagkakadiskubre ng lugar, nangako ang lokal na pamahalaan na tutulungan ang mga katutubo sa paglinang sa likas na yaman tulad ng pagtuturo sa kanila ng mga makabagong proseso ng pagtatanim at ang pagpapaayos ng daan sa kanilang lugar patungo sa kabilang barangay.

Source:

Hango sa artikulo ni Flord Calawag sa Philippine Daily Inquirer, 14 Setyembre 2015 na pinamagatang Rice Terraces ‘rediscovered’ in Antique